 |
| Bro Jackobo |
Name:Bro Jackobo
Phone: +255766944441
Email: jackobombwaga@gmail.com
Bwana Yesu asifiwe mtumishi wa Mungu?? Karibu tujifunze kwa pamoja kidogo kuhusu hili swali...
Tutaliangalia somo hili katika mtiririko huu ili kuturahishia kuelewa
✍️Utangulizi: Mtoto/mwana wa Mungu ni yupi?
✍️Mungu anasema nini kuhusu kumuacha Mtoto wake katika agano la kale na agano jipya?
✍️Nini hitimisho juu ya swali hili
✍️ Nini matokeo endapo mtu atamuacha Mungu
✍️ Hitimisho juu ya mtu baada ya kumuacha Mungu inakuwaje sasa kuhusu ushirika wake na Mungu
✍️Hitimisho la mwisho kamili la swali {Jibu kamili la swali}
Kumekuwa na mjadala mkubwa sana kwamba je Mungu anaweza kumuacha mtu/mwana/mtoto wake??...
Jibu rahisi kabisa: MUNGU hawezi kumuacha mtoto wake hata siku moja na hajawahi kufikiri hata siku moja kukaa naye mbali ila mwanadamu anaweza kumuacha Mungu.
Kupitia hilo jibu hapo tutaenda kudadavua vizuri sasa kupitia maandiko na baada ya hapo tutaona matokeo ya mwana au mtoto kumuacha Mungu.
UTANGULIZI WA SOMO
Je mwana wa Mungu ni yupi?
Mtoto au mwana ninayetaka kuzungumzia hapa ni yule mtu ambaye amekwisha kuamini na kufanyika ushirika na Mungu ambaye Mungu amekuwa Baba na yeye mwana. Sasa ili mtu ufanyike mwana wa Mungu lazima ukubali kumpa Yesu kristo maisha yako yaani uokoke.👇👇👇👇
Yohana 1:12-13
"Bali wote waliompokea aliwapa uwezo wa kufanyika watoto wa Mungu, ndio wale waliaminio jina lake; waliozaliwa, si kwa damu, wala si kwa mapenzi ya mwili, wala si kwa mapenzi ya mtu, bali kwa Mungu."
Unapompokea Yesu ndipo unafanyika mwana wake na kumpokea Yesu kunakuja kwa wewe kuamini na kumkiri Yesu kristo ambapo huo ukiri unatakiwa kuenenda pamoja na Matendo yako ya kila siku unapokuwa unaishi.👇👇👇
Warumi 10:9-10,13
"Kwa sababu, ukimkiri Yesu kwa kinywa chako ya kuwa ni Bwana, na kuamini moyoni mwako ya kuwa Mungu alimfufua katika wafu, utaokoka. Kwa maana kwa moyo mtu huamini hata kupata haki, na kwa kinywa hukiri hata kupata wokovu. kwa kuwa, Kila atakayeliitia Jina la Bwana ataokoka."
Baada ya kuamini na kuokoka ndipo unafanyika kuwa mwana/mtoto wa Mungu na kama ukaamini ukawa bado unaishi maisha ya Dhambi wewe bado hujatambua vyema kufanywa kwako upya na hapo unakuwa sio mwana wa Mungu bali unakuwa mtu wa Mungu maana ikiwa unalitaja jina lake inakupasa uache dhambi zako zote👇👇👇
2 Timotheo 2:19
"Lakini msingi wa Mungu ulio imara umesimama, wenye muhuri hii, Bwana awajua walio wake.
Na tena, Kila alitajaye jina la Bwana na auache uovu."
Msingi wa mwanadamu kuwa mwana wa Mungu lazima akubali kuuacha uovu wake wote yaani asiendelee kuishi katika dhambi.
1 Yohana 1:6
"Tukisema ya kwamba twashirikiana naye, tena tukienenda gizani, twasema uongo, wala hatuifanyi iliyo kweli;"
Yohana 14:21
"Yeye aliye na amri zangu, na kuzishika, yeye ndiye anipendaye; naye anipendaye atapendwa na Baba yangu; nami nitampenda na kujidhihirisha kwake."
Ukisoma hayo mafungu mawili yanakuonyesha wazi kwamba anayekubalika ni yule ambaye anaishi sheria za Mungu na sio kunena katika kinywa tu halafu huku anaishi tofauti na sheria ya Mungu.
Kiufupi nitaenda kueleza juu ya Mtu aliyeokoka, Mungu pamoja na kuacha.
Baada ya kuona mwana/mtoto ninayemzungumzia ni yupi basi tuende kwenye kiini cha neno/somo letu lililo katika mfumo wa swali. "Je Mungu anaweza kumuacha mtoto wake?"
KIINI CHA SOMO:
Kama nilivyokwisha kuwaambia ya kwamba Mungu hawezi kumuacha mtu yeyote tena hana hata mpango wa kumuacha mtu yule ambaye yuko kwakwe na anaishi katika kweli yake. Naomba nianze katika agano la kale namna Mungu alivyolithibitisha hili neno kwamba hawezi kukuacha hata siku moja.👇👇👇
Isaya 49:14-16
"Bali Sayuni alisema, YEHOVA ameniacha, Bwana amenisahau. Je! Mwanamke aweza kumsahau mtoto wake anyonyaye, hata asimhurumie mwana wa tumbo lake? Naam, hawa waweza kusahau, lakini mimi sitakusahau wewe. Tazama, nimekuchora katika vitanga vya mikono yangu; kuta zako ziko mbele zangu daima."
Hapo Mungu alikuwa akizungumza na wana wa Israel walipokuwa wanafikiri kwamba Mungu amewaacha lakini Mungu anakuja kuwajibu kwamba hawezi kuwaacha maana wako kwenye vitanga vya mkono wake kiasi kwamba anawatazama mda wote wakiwa hata kama wakiwa kwenye kipindi kigumu. Ndio maana hata Suleiman Mungu alimwambia aende katika njia ya Mungu ndipo atakuwa na yeye na kuzithibitisha zile ahadi aliahidiana na Daudi baba yake.👇👇👇
2 Mambo ya Nyakati 7:17-18
"Nawe, ukienda mbele yangu kama alivyokwenda Daudi baba yako, ufanye sawasawa na yote niliyokuamuru, na kuzishika sheria zangu na hukumu zangu; ndipo nitakithibitisha kiti cha enzi cha ufalme wako, kama nilivyoagana na Daudi baba yako, nikisema, Hutakosa kuwa na mtu wa kutawala katika Israeli."
Sio Suleiman aliambiwa peke yake pia hata Yakobo aliahidiwa kwamba Mungu atakuwa naye wakati wote👇👇
Mwanzo 28:15
"Na tazama, mimi nipo pamoja nawe, nitakulinda kila uendako, nami nitakuleta tena mpaka nchi hii, kwa maana sitakuacha, hata nitakapokufanyia hayo niliyokuambia."
N.B: unaweza kusoma kwa wakati wako {Yoshua1:5, Yeremia30:11, 46:28}
Tumeona namna agano la kale ambavyo Mungu aliwaahidi watumishi wake kwamba hatawaacha naomba tuone pia katika agano jipya Mungu alisemaje pia👇👇👇
Yohana 6:37-39
"Wote anipao Baba watakuja kwangu; wala ye yote ajaye kwangu sitamtupa nje kamwe. Kwa kuwa mimi sikushuka kutoka mbinguni ili niyafanye mapenzi yangu, bali mapenzi yake aliyenipeleka. Na mapenzi yake aliyenipeleka ni haya, ya kwamba katika wote alionipa nisimpoteze hata mmoja, bali nimfufue siku ya mwisho."
Kama nilivyokwisha kukueleza kwamba Mungu hana mpango wa kumuacha Mtoto wake, unaona hapo Yesu anasema mwenyewe wote ambao wamekuja kwake hatamtupa hata mmoja na ndio maana nakuambia Mungu hawezi kumuacha mtoto wake hata siku moja maana yeye anatamani tukae katika pendo lake siku zote. Na ndio maana Yesu alijitahidi kuwalinda wanafunzi wake wote ili asiwepo hata mmoja wa kupotea 👇👇
Yohana 17:12
"Nilipokuwapo pamoja nao, mimi naliwalinda kwa jina lako ulilonipa, nikawatunza; wala hapana mmojawapo wao aliyepotea, ila yule mwana wa upotevu, ili andiko litimie."
Hitimisho 1: Kulingana na namna tulivyoenda na kuona maandiko hayo hapo juu ni dhahiri kwamba Mungu hawezi kumuacha mwana/mtoto wake hata siku moja na huwa anachokiangalia ni kuhakikisha mtu huyu anakaa kwenye neno lake la kweli tu.
Je inakuwaje sasa ikiwa mtoto amefanya dhambi??
Dhambi ni uasi yaani kwenda kinyume na maagizo ya Mungu aliyokuamuru kuishi kwa hayo. 👇👇👇
1 Yohana 3:4
"Kila atendaye dhambi, afanya uasi; kwa kuwa dhambi ni uasi."
Mungu wetu ni mwaminifu ambapo amempa mtu nafasi ya kuchagua mema au mabaya sasa yeye mwenyewe anaweza kuamua kuishi katika dhambi au kuishi kwa namna Vile Mungu anataka. Sasa ikiwa huyu mtu ambaye Mungu amesema hatamuacha akaenda kufuata tamaa na mambo ya kidunia biblia inasemaje hapo??
Yohana 14:21
"Yeye aliye na amri zangu, na kuzishika, yeye ndiye anipendaye; naye anipendaye atapendwa na Baba yangu; nami nitampenda na kujidhihirisha kwake."
2 Mambo ya Nyakati 7:19-20
"Lakini mkigeuka, na kuziacha sheria zangu na amri zangu nilizoweka mbele yenu, mkienda, na kuitumikia miungu mingine, na kuiabudu; ndipo nitawang’oa katika nchi yangu niliyowapa; na nyumba hii niliyoitakasa kwa jina langu, nitaiondosha itoke mbele zangu, nami nitaifanya kuwa mithali na tukano katikati ya watu wote."
Katika maandiko hayo anaonyesha ya kwamba yeye atakuwa pamoja na wale ambao wanaishi kwa sheria yake na hao ndio atakuwa anajidhihirisha kwao lakini ukiwa unafanya dhambi basi uwe na uhakika atakuwa mbali na wewe ila kwasababu ya wewe kutokumheshimu yeye.
MATOKEO YA DHAMBI KATIKA USHIRIKA NA MUNGU
1. Kuharibika kwa uhusiano wako na Mungu.
Isaya 59:2
"lakini maovu yenu yamewafarikisha ninyi na Mungu wenu, na dhambi zenu zimeuficha uso wake msiuone, hata hataki kusikia."
Matokeo ya kufanya uovu yanakufanya uhusiano wako na mungu uharibike.
2. Roho wa Mungu anahuzunishwa ndani
Waefeso 4:30
"Wala msimhuzunishe yule Roho Mtakatifu wa Mungu; ambaye kwa yeye mlitiwa muhuri hata siku ya ukombozi."
Ukianza mistari ya nyuma utaona anawaeleza habari ya dhmbi ndio anakuja kuwaambia msije kumhudhunisha roho wa Mungu.
3. Roho mtakatifu kuondoka ndani ya mwamini
Zaburi 51:11
"Usinitenge na uso wako,
Wala roho yako mtakatifu usiniondolee."
Daudi alipofanya dhambi na akaamua kutubu anakuja kusema Roho wa Mungu asiondolewa hiyo inatupa picha kwamba utendapo dhambi Roho mtakatifu anaondoka.
4. Kuacha Mungu kujidhihirisha kwako katika mambo mbalimbali
(Yohana14:21, 2Nyakati19-20)
Yapo matokeo Mengi ya dhambi ila nimeyaweka haya ili niweze kukamilisha somo.
Sasa ukiangalia hapo kwenye hayo maandiko na hizo tokeo za dhambi ni zahiri kwamba kwasababu ya dhambi huwa ushirika unaharibika maana kama Roho mtakatifu atakuwa anahuzunika, akaondoka kwako na akaacha kujidhirisha kwako utakuwa na usalama gani na utakuwa unahusiana na Mungu kwa namna gani?? Kwahiyo baada ya wewe kumuacha Mungu na yeye pia anakuacha uende unakotaka maana yeye amekupa maamuzi ya kuchukua👇👇
Kumbukumbu la Torati 30:19
"Nazishuhudiza mbingu na nchi juu yenu hivi leo, kuwa nimekuwekea mbele yako uzima na mauti, baraka na laana; basi chagua uzima, ili uwe hai, wewe na uzao wako;"
Japo anakushauri bado uchague mema ili aende na wewe.
Mwingine atasema hatuhesabiwi haki kwa matendo yetu sasa inakuwaje? Na tena tuko kwa kipindi cha Neema... Sawa nakubaliana na wewe ila naomba tuone👇👇👇
Warumi 6:1-2
"Tuseme nini basi? Tudumu katika dhambi ili neema izidi kuwa nyingi? Hasha! Sisi tulioifia dhambi tutaishije tena katika dhambi?"
Tito 2:11-12
"Maana neema ya Mungu iwaokoayo wanadamu wote imefunuliwa; nayo yatufundisha kukataa ubaya na tamaa za kidunia; tupate kuishi kwa kiasi, na haki, na utauwa, katika ulimwengu huu wa sasa;"
Ili uelewe neema imefunuliwa kwako lazima uwe hauishi maisha ya dhambi ndipo ambapo utakuwa katika neema, kama wewe unaishi maisha ya dhambi bado hauko katika neema na ukiwa katika kristo Yesu lazima uache dhambi na hautakiwi kuishi huko kwenye dhambi.
Mwingine atasema kwamba sitahesabiwa haki kwa matendo yangu... Sawa nakubali lakini biblia imesema tujitahidi kuishi namna Mungu anataka ndipo atajionyesha kwetu, haki yako iko ndani ya kristo na ukiwa katika kristo lazima uyafanye ya kristo aliyokuwa anayafanya👇👇👇👇
1 Yohana 1:6
"Tukisema ya kwamba twashirikiana naye, tena tukienenda gizani, twasema uongo, wala hatuifanyi iliyo kweli;"
Kwahiyo ukiri, imani lazima iendane na matendo.
Pia kumbuka biblia inavyosema👇👇👇
Warumi 8:9
"Lakini ikiwa Roho wa Mungu anakaa ndani yenu, ninyi hamwufuati mwili; bali mwaifuata roho. Lakini mtu awaye yote asipokuwa na Roho wa Kristo, huyo si wake."
Sasa ukiwa Roho wa Mungu hayupo pamoja na wewe inakuwaje? wewe unakuwa sio mwana wa Mungu bali unakuwa ni mtu wa Mungu ambapo anakuwa anakusubiri utubu ili aweze kukusamehe na aendelee kuwa pamoja na wewe.
Hitimisho2: kutokana na maandiko hapo juu ikiwa mtu amefanya dhambi basi anafungua mlango wa Mungu kumuacha maana Mungu hana ushirika na giza maana huyo mtu atakuwa hayuko na Mungu mpaka pale atakapokuwa ametubu na kuungama dhambi zake.
HITIMISHO KAMILI
Mungu hawezi kumuacha mtu hata siku moja na wakati wote atakuwa anatafuta namna ya kumfanya mtu aendelee kukaa kwenye pendo lake wakati wote ila endapo huyo mtu atachagua kutokuenda na Mungu basi yeye hamlazimishi anamuacha atoke kwenye utawala wake na milki yake.
Mpendwa katika kristo jitahidi kufanya mapenzi ya Mungu ili usije ukafarakana na Mungu na kujikuta umebaki mwenyewe.
Ulikuwa nami mpendwa katika kristo yesu
Name: Bro Jackobo
Phone: +255766944441
Email: jackobombwaga@gmail.com
